ក្រុមការងារថវិការបស់អង្គការសង្គមស៊ីវិល (CSO BWG) ដែលជាសម្ព័ន្ធនៃអង្គការសង្គមស៊ីវិល ដែលធ្វើការផ្ដោតទាំងស្រុងដល់ការលើកកម្ពស់ ការបើកចំហ គណនេយ្យភាព និងការត្រួតពិនិត្យ ថវិកា បានធ្វើការវិភាគ និងបង្កើតឯកសារគោលជំហររួមមួយស្តីពីការវិភាគច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២៥ ដែលត្រូវបានគេស្គាល់ជាទូទៅថាជាច្បាប់ថវិកាជាតិ។

ការវិភាគថវិកានេះមានគោលបំណងផ្តល់នូវការយល់ដឹងទូលំទូលាយអំពីថវិកាប្រចាំឆ្នាំរបស់រដ្ឋាភិបាល និងផ្តល់នូវធាតុចូលដ៏មានតម្លៃ និងអនុសាសន៍សំខាន់ៗដល់រាជរដ្ឋាភិបាល និងសភាកម្ពុជា។ នេះជាគំនិតផ្ដួចផ្ដើមក្នុងការស្វែងរកការកែលម្អគោលនយោបាយសារពើពន្ធដើម្បីដោះស្រាយតម្រូវ ការសាធារណៈកាន់តែប្រសើរឡើង ក្នុងពេលដំណាលគ្នានឹងបង្កើនតម្លាភាព និងគណនេយ្យភាព ក្នុងការគ្រប់គ្រងថវិកា។